მშენებლობის ტენდენციები 2008 წელს

ნინო არველაძე

მსოფლიოს წამყვანი ეკონომიკების იპოთეკურ ბაზრებს კრიზისული პერიოდი დაუდგათ. ქართველი ექსპერტები აცხადებენ, რომ მსოფლიოს ეს სერიოზული ტალღა საქართველოში არ გავრცელდება. საქართველოს სამშენებლო სექტორის წარმომადგენლები საშიშროებას ვერ ხედავენ და აცხადებენ, რომ ამ მხრივ საქართველოს მოსახლეობის მოთხოვნა მნიშვნელოვნად იზრდება. გასულ წლებში რუსეთიდან შემოდინებული კაპიტალი ცენტრალურ უბნებში მიმდინარე მშენებლობებზე მიდიოდა, დღესდღეობით საზღვარგარეთიდან შემოსული ფულადი გზავნილების საკმაოდ დიდი ნაწილი მშენებლობაში იხარჯება, მაგრამ ეს ცენტრალურ უბნებს არ ეხება.

არქიტექტორ ზაზა კვირკველიას აზრით, საქართველოს სამშენებლო ბაზარი გაჯერებული ჯერ კიდევ არ არის, რასაც ძვირადღირებული ფართების ბაზარზე ვერ ვიტყვით, ხოლო ეკონომკლასზე მოთხოვნა კი იზრდება.
არქიტექტორი ზაზა კვირკველია ჩვენთან საუბარში აცხადებს, რომ საქართველოს სამშენებლო სექტორი ვითარდება და ხარისხის ამაღლებას მნიშვნელოვანი ყურადღება ენიჭება. საქართველოს მოსახლეობაში საშუალო ფენა ყალიბდება, ამ ფაქტის გათვალისწინებით ქალაქის სამშენებლო სექტორი ქალაქის ცენტრიდან მისი გარეუბნებისკენ ინაცვლებს, მოთხოვნა კი საშუალოფასიან საცხოვრებელ ადგილებზე იზრდება, საშუალო ფასად ითვლება კვმ-ზე 800-1000 დოლარი. ამ ტენდენციის გამომწვევი კიდევ ერთი მიზეზია ქალაქის ცენტრალურ უბნებში მიწის ფასის მკვეთრი ზრდა, სადაც ფასები ერთ კვმ-ზე 1200-1500 დოლარიდან იწყება, დიდუბეში 1 კვმ მიწის ფასი 1000 დოლარიდან იწყება, ხოლო, რაც შეეხება ვაკისა და ვერის ტერიტორიებს, ბატონი ზაზა კვირკველიას თქმით, აღნიშნულ უბნებში გასაყიდი მიწა აღარ არსებობს, ამიტომ ფასებზე საუბარი ძალიან რთულია.
საქართველოს მოსახლეობის მოთხოვნა ახალ საცხოვრებელ ფართზე მნიშვნელოვნად გაიზარდა, რადგან ფულადი გზავნილების მაჩვენებელი მიმდინარე წელს 53%-ით გაიზარდა, რომლის უმეტესი ნაწილიც სამშენებლო სექტორში მიდის.
ქალაქის განვითარების დეპარტამენტის მონაცემებით, საქართველოში ჯერჯერობით მშენებლობისთვის 4 მლნ კვმ მიწა დამტკიცდა, მაგრამ წელი ჯერ დასრულებული არ არის და ეს ციფრიც საბოლოო ვერ იქნება, 2006 წელს ეს მაჩვენებელი 2 მლნ მ2 იყო. დამტკიცებულ ფართებზე შენობები 2 წლის განმავლობაში უნდა აშენდეს, მაგრამ გასათვალისწინებელია ის, რომ მომდევნო წელს ნებართვების რაოდენობაც გაიზრდება.
ყველაზე კარგად იყიდება 50-60 კვმ ფართის საცხოვრებელი ბინები, რომლებიც ცენტრალურ უბნებში არ შენდება და მომხმარებელს შეუძლია ორი, ან სამოთახიანი ბინა 40-50 ათასი დოლარის ფარგლებში შეიძინოს. დიდი დიღმის ტერიტორიაზე არსებულ საცხოვრებელ ბინებზე მაღალი მოთხოვნაა. ექსპერტები ვარაუდობენ, რომ მომავალი წლისთვის მშენებლობისთვის განკუთვნილი მიწის მოცულობა 8 მლნ კვმ მიაღწევს. თუმცა ზაზა კვირკველია აცხადებს, რომ ეს მაჩვენებელიც კი არ არის საკმარისი საქართველოს მოსახლეობის მოთხოვნის დასაკმაყოფილებლად.
სამშენებლო სექტორში დაახლოებით 10 ფირმა მოღვაწეობს.
დეფიციტურია კომერციული და საოფისე ფართებიც, რადგან მათ მიმართ ინტერესი მკვეთრად იზრდება, მაგრამ მათი შესყიდვა თითქმის შეუძლებელია. საოფისე ფართის ფასი ცენტრალურ უბნებში კვმ-ზე 2000 დოლარიდან იწყება და 2400 დოლარს აღწევს. ხოლო კომერციული ფართის ფასი კვმ-ზე 5 000 დოლარს აღწევს:
ბაგები – 1 400 დოლარიდან;
საბურთალო – 800 დოლარიდან;
საირმე – 1000 დოლარიდან;
ჯიქიას ქ. – 450 დოლარიდან;
გაგარინი – 800 დოლარიდან;
ორთაჭალა – 650 დოლარიდან;
მ. “სარაჯიშვილი” – 450 დოლარიდან;
გელოვანის გამზირი (ვაშლიჯვრის ასახვევი) – 450 დოლარიდან;
ავლაბარი – 700 დოლარიდან;
კრწანისი – 800 დოლარიდან;
დიღმის ტყე-პარკი – 650 დოლარიდან;
მ. “ისანი” – 700 დოლარიდან;
მ. “ვარკეთილი” – 600 დოლარიდან;
დიდი დიღომი – 600 დოლარიდან;

comments

Social media & sharing icons powered by UltimatelySocial