საპარტნიორო ფონდმა „პანექსის“ საწარმო გახსნა

საპარტნიორო ფონდმა და ადგილობრივმა კომპანია შპს ICES-მა ე.წ. სენდვიჩ პანელების პროექტი დაასრულა და პროექტის ფარგლებში აშენებული საწარმო გახსნა. საწარმოში მოხდება ე.წ. სენდვიჩ პანელების პროდუქციის წარმოება, რომელიც ინდუსტრიული დანიშნულების შენობების მშენებლობისას გამოიყენება. საწარმო პრემიერ მინისტრმა ირაკლი ღარიბაშვილმა საპარტნიორო ფონდის აღმასრულებელ დირექტორ ირაკლი კოვზანაძესთან ერთად გახსნა. „სამშენებლო სექტორისთვის ეს დიდი დახმარებაა, რადგან იგი გააიაფებს ინდუსტრიული მშენებლობის ხარჯებს. უფრო კონკრეტულად, საქართველოში წარმოებული პროდუქცია ჩაანაცვლებს იმპორტს და შესაბამისად, სამშენებლო კომპანიებს შეუმცირდებათ დანახარჯები.

ეს კი უკვე შემდგომში, ამ კომპანიების მიერ წარმოებული პროდუქციის ფასებზე დადებითად აისახება,” განაცხადა ირაკლი კოვზანაძემ. პროდუქცია რკინა-ბეტონის კონსტრუქციაზე იაფია, ხოლო მისი დამონტაჟება ნაკლებ დროს მოითხოვს და სხვა სამშენებლო მასალებთან შედარებით მოცულობაში ნაკლებია. საწარმო ქ. რუსთავის გზატკეცილზე აშენდა და თანამედროვე იტალიური დანადგარებით აღიჭურვა. პროდუქციის 60 პროცენტი საქართველოში გაიყიდება, ხოლო დარჩენილი ნაწილი ექსპორტზე გავა: ყაზახეთში, აზერბაიჯანში, უკრაინასა და რუსეთში. საწარმოო ხაზის დაგეგმილი სიმძლავრე: წელიწადში 2.8 მლნ მ2 პანელია. პროექტზე მუშაობა საპარტნიორო ფონდმა ადგილობრივ კომპანიაშპს ICES-თან ერთად გასული წლის მარტში დაიწყო. ინვესტიციის მთლიანი მოცულობა $ 6 მლნ აშშ დოლარია. ფონდის მონაწილეობა პროექტში 49%-ია.

გახსნის ცერემონიას პრემიერ-მინისტრი ირაკლი ღარიბაშვილი დაესწრო. მან ახლადაშენებული საწარმო დაათვალიერა და იმედი გამოთქვა, რომ საქართველოში წარმოებული პროდუქცია გააიაფებს ინდუსტრიული მშენებლობების ხარჯებს და ხელს შეუწყობს სამშენებელო სექტორის განვითარებას.

„ასეთი სამშენებლო მასალის წარმოება მნიშვნელოვანი სიახლეა ჩვენთვის. დარწმუნებული ვარ, ეს დიდ დახმარებას გაუწევს ჩვენს სამშენებლო სექტორს. ჩვენს მშენებლებს არ მოუწევთ უცხოეთიდან პროდუქციის შემოტანა. „პანექსის“ პროდუქცია ასევე გავა ექსპორტზე ყაზახეთში, აზერბაიჯანში, უკრაინასა და რუსეთში ,“-აღნიშნა პრემიერმა.

მისივე თქმით, სახელმწიფოსა და კერძო ბიზნესის თანამშრომლობას დადებითი შედეგები მოაქვს ქვეყნის ეკონომიკისთვის.

„ჩვენი ხელისუფლების პრიორიტეტი არის წარმოების განვითარება. იმედი მაქვს, რომ იმპორტს ადგილობრივი წარმოება ჩაანაცვლებს, რომელიც ექსპორტზე ორიენტირებული იქნება,“-განაცხადა ირაკლი ღარიბაშვილმა.